Hörmətli konfrans iştirakçıları,
Azərbaycan tarixində Ümummilli lider adını qazanmış görkəmli dövlət xadimi Heydər Əliyev xalqımızın yaddaşına dahi insan, tarixi yazan və yaradan siyasətçi, müasir Azərbaycan dövlətçiliyinin banisi, xalq məhəbbətini qazanmış Ulu öndər kimi həkk olunmuşdur.
Ümummilli lider Heydər Əliyevin misilsiz xidmətləri sayəsində quruculuq dövrünü yaşayan müstəqil Azərbaycanın bütün sahələrində olduğu kimi elm, təhsil və səhiyyə sektorlarında da mühüm inkişaf, yüksək nəticələr əldə olunmuşdur. Ulu öndərin rəhbərliyi altında həyata keçirilən islahatlar səhiyyə sahəsində inkişafın əsasını qoymuş, yeni perspektivləri müəyyənləşdirmişdir. Səhiyyənin vacib istiqamətlərindən olan kardiologiya və ürək-damar cərrahiyyəsi sahələrində də məhz Ümummilli liderimizin diqqət və qayğısı sayəsində məqsədyönlü şəkildə uğurlara nail olunmuşdur.
Heydər Əliyev siyasətinin layiqli davamçısı möhtərəm Prezidentimiz İlham Əliyevin rəhbərliyi ilə sonrakı dövrdə də Azərbaycanın səhiyyə sisteminin inkişafı, həmçinin anadangəlmə ürək qüsurlarının müalicəsinin təşkilində rolu olan prenatal diaqnostika, neonatologiya, pediatriya və uşaq kardiologiyasının da dünya standartları səviyyəsinə yüksəldilməsi istiqamətində nəzərəçarpan nailiyyətlər əldə olunmuşdur.
Azərbaycanın Birinci vitse-prezidenti Mehriban xanım Əliyevanın rəhbərliyi altında fəaliyyət göstərən Heydər Əliyev Fondu da dövlətimiz tərəfindən bu sahədə görülən işlərə, xüsusən də anadangəlmə ürək qüsuru olan uşaqların problemlərinin həllinə hər zaman öz əvəzolunmaz dəstəyini verir. Bu Elmi-Praktik Konfransın da məqsədi Azərbaycanda anadangəlmə ürək qüsuru olan uşaqların müalicəsinin davamlı inkişafına töhfə vermək, beynəlxalq mütəxəssislərlə təcrübə mübadiləsi aparmaq və tibb elminin son yeniliklərini müzakirə etməkdir.
Ümidvaram ki, Ümummilli lider Heydər Əliyevin anım gününə həsr edilmiş "Anadangəlmə ürək-damar xəstəliklərinin müalicəsində müasir yanaşmalar" mövzusundakı bu konfrans Ulu öndərin Azərbaycan səhiyyəsinin, eləcə də Azərbaycan tibb elminin dayanıqlı və sabit inkişafına verdiyi töhfələri bir daha xatırlamağa imkan verəcək, eyni zamanda səhiyyənin daha böyük uğurlara nail olmasına dəstək olacaq. Bu konfransın həkimlər üçün dəyərli məlumatlar əldə edə biləcəkləri maraqlı bir tədbir olduğuna inanır və bütün konfrans iştirakçılarına uğurlar arzu edirəm.
Ceyhun MƏMMƏDOV
Azərbaycan Respublikası
Dövlət Gömrük Komitəsi
Tibbi Xidmət İdarəsinin rəisi
tibb xidməti polkovniki
